श्रमिकका लागि ‘हामी’ एप

काठमाडौं । श्रम रोजगार तथा सामाजिक सुरक्षा मन्त्री शरतसिंह भण्डारीले श्रम क्षेत्रलाई व्यवस्थित गर्न सम्पूर्ण सेवाहरु डिजिटलाइजेसन हुनुपर्ने बताउनु भएको छ ।
बिहिबार ललितपुरमा कोरिया इन्टरनेशनल कर्पाेरेसन एजेन्सी (कोइका) ले आयोजना गरेको हामी एप सार्वजनिक एवम आप्रवासन सम्मेलनको उद्घाटन कार्यक्रममा बोल्दै मन्त्री भण्डारीले श्रम क्षेत्रमा देखिएको समस्या समाधानका लागि सबै सेवाहरु डिजिटलाइजेसन हुनुपर्नेमा जोड दिनुभएको छ ।
उनले नेपाली श्रमिकले बगाएको पसिनाका कारण गन्तव्य मुलुकको विकास भएको भन्दै सम्मानित श्रम र सुरक्षित आप्रवासनलाई जोड दिदैं नेपाली श्रमिकको सम्मान हुनुपर्ने बताउनुभयो ।
मन्त्री भण्डारीले श्रम सम्बन्धी सही सूचनाको जानकारी दिन श्रम संसार लागु गरेको बताउँदै १० बर्षमा नेपालबाट बाध्यात्मक श्रमका लागि विदेश जाने अवस्थाको अन्त्य हुने पनि बताउनु भयो ।
‘सूचनाको अभावले धेरै मानिसहरु प्रभावित भएका छन, ठगीमा परेका छन्, यी कुरालाई ध्यानमा दिएर श्रमसंसार सञ्चालनमा ल्याएका छौं ।’, उनले भने, श्रम सम्बन्धी सम्पूर्ण कुराहरु राखेका छौँ, मानिसको ओैलामा नेपालको श्रम बजार छ, हामी वैदेशिक रोजगार भन्दा बढि नेपालको आन्तरिक रोजगारीलाई प्राथमिकतामा राखेका छौं । ’
उनले नेपालीहरुले कोरियाको १९६० को अनुभवलाई अंगीकार गरेर अगाडि बढ्नुपर्नेमा दिनुभयो  । नेपालीहरुले कोरियालाई आकर्षक गन्तव्यको रुपमा मान्ने गरेको भन्दै यसलाई व्यवस्थापन गर्न मन्त्री भण्डारीले आग्रह गर्नुभयो  ।
हामी एप नेपाली श्रमिकहरूको अधिकार सुरक्षाका लागि एक महत्वपूर्ण उपकरण सावित हुने बताउँदै यसले व्यवस्थित आप्रवासन प्रक्रियामा मद्दत र्पुयाउने विश्वास व्यक्त गर्नुभयो  ।  ‘सरकार सुरक्षित आप्रवासन र सफल पुनः एकीकरण सुनिश्चित गर्ने नीतिहरू विकास गर्न प्रतिबद्ध छ ।’, उहाँको भनाइ थियो ।
कार्यक्रममा नेपालका लागि गणतन्त्र कोरियाका राजदूत पार्क टे–यङले ‘हामी’ एपलाई नेपाल–कोरिया साझेदारीको प्रतिक भएको बताउनुभयो ।
कोरिया इन्टरनेशनल कोअपरेशन एजेन्सी र ह्यूमन रिसोर्सेज डेभलपमेन्ट सर्भिस अफ कोरियाद्वारा संयुक्त रूपमा सञ्चालन गरिएको ‘हामी’ मोबाइल एप नेपाली श्रमिकहरूलाई लक्षित गरी विकसित गरिएको सुरक्षित वैदेशिक रोजगारीलाई प्रवद्र्धन गर्ने तथा उनीहरू स्वदेश फर्किएपछि स्थिर पुनः एकीकरणमा सहयोग र्पुयाउने उद्देश्यले सुरु गरिएको हो । ‘हामी’ शब्द हयापी माइग्रेसनको संक्षिप्त रूप हो, जसले नेपाली भाषामा “हामी” अर्थात एकता र सहकार्यको भावनालाई पनि झल्काउँछ ।

यस एपले पूर्व–प्रवास चरणमा श्रमिकहरूलाई दृष्टिकोण निर्माण, वित्तीय साक्षरता तथा जीवन सुरक्षासम्बन्धी तालिम प्रदान गर्नेछ । प्रवासको अवधिमा उनीहरूले ‘हामी’ एपमार्फत आवश्यक जानकारी तथा स्रोतहरूमा पहुँच पाउँछन, साथै सप्ताहन्तमा आधारित सीप र उद्यमशीलता तालिममा सहभागी हुन सक्ने व्यवस्था मिलाइएको छ । स्वदेश फर्किएपछि पश्च–प्रवास चरणमा पुनः एकीकरणसम्बन्धी जानकारी, उद्यमशीलता तालिम र नयाँ व्यवसाय सुरु गर्न बीउ पूँजी जस्ता सहयोगहरू उपलब्ध गराइनेछ ।