काठमाडौं : निजी विद्यालय सञ्चालक र प्रधानअध्यापकहरुको नेतृत्वदायी र व्यवस्थापकीय क्षमता बढाउन काठमाडौं विश्वविद्यालयको स्कुल अफ एजुकेशनले विशेष तालिम कार्यक्रम सञ्चालन गर्ने भएको छ ।
शुक्रबार राजधानीमा आयोजित एक कार्यक्रमबीच यससम्बन्धी समझदारी पत्रमा विश्वविद्यालयको स्कुल अफ एजुकेशन र निजी तथा आवाशिय विद्यालय अर्गनाइजेशन (व्याब्सन)बीच हस्ताक्षर सम्पन्न भएको थियो । उक्त समझारीपत्रमा व्याब्सनको तर्फबाट राष्ट्रिय अध्यक्ष डिके ढुंगाना र कावीको स्कुल अफ एजुकेशनकातर्फबाट डिन बालचन्द्र लुईँटेलसहितका प्रमुख पदाधिकारीहरुले हस्ताक्षर गर्नुभएको थियो ।
समझदारी पत्रअनुसार स्कुल अफ एजुकेशनले प्याब्सन सदस्य रहेका निजी विद्यालयका प्रधानाध्यापक तथा शिक्षकहरुलाई एक वर्षे अवधिको डिप्लोमा तथा स्नातकोत्तर सरहको तालिम प्रदान गर्नेछ । यसका लागि ७० लाख रुपैयाँ खर्च हुने जानकारी पनि कार्यक्रममा दिइयो । हस्ताक्षरपछि बोल्दै डिन लुईंटेलले विद्यालय तहमा सक्षम नेतृत्व हुँदा नै समाजलाई बाटो देखाउन सक्ने आदर्शवान् शिक्षक र अन्तर्राष्ट्रिय स्तरमा प्रतिस्पर्धा गर्न सक्ने जनशक्ति देशमा उत्पादन गर्न सकिने भएकोले यस प्रकारको तालिम आवश्यक रहेको बताउनुभयो । नवप्रवर्तनीय काम सहजै र छिटो हुने भएका कारण यस्तो तालिमका लागि निजी शैक्षिक सँस्थाहरु काठमाडौं विश्वविद्यालयका स्वाभाविक साझेदार भएको भनाई उहाँको थियो । यद्यपी सार्वजनिक विद्यालयका प्रधानाध्यापकलाई समेत यस्तो तालिम आवश्यक पर्ने धारणा पनि उहाँको थियो ।
कार्यक्रममा व्याब्सन अध्यक्ष ढुंगानाले कार्यक्रमले एउटा दक्ष र सृजनशील प्राचार्यहरु उत्पादन गर्ने भएकोले गरिएको समझदारी एउटा समझदारी मात्र नभएर शैक्षिक विकासमा एक महत्वपूर्ण प्रस्थानविन्दु समेत भएको बताउनुभयो । व्याब्सनको वर्तमान नेतृत्व निजी विद्यालयको क्षमता वृद्धि, मर्जका लागि प्रोत्साहन सहित विभिन्न क्षेत्रमा नयाँ ढंगले काम गर्न खोजिरहेको जानकारी पनि उहाँले दिनुभयो ।
प्रतिक्रिया