गाह्रो भो, अब पसल खोल्न पाउँ ….

काठमाडौंः सरकारले कोभिड–१९ संक्रमण रोकथान तथा नियन्त्रणका लागि जारी गरेको लकडाउनले दैनिकी चलाउनसमेत असर पर्न थालेपछि व्यापारीहरु पसल खोल्न पाउनुपर्ने माग गर्दै सडकमा उत्रिएका छन् ।
विगत ७० औँ दिनको लगातारको लकडाउनका कारण व्यापारीहरुले व्यापार गर्न नपाएको र पसलको भाडा,बैंक किस्ता,बैंकको ब्याज तिर्नुपर्ने हुनाले अब ब्यवसाय नगरे धान्न नसक्ने भनाई उनीहरुको छ । ‘दैनिक गुजारा चलाउनसमेत अफ्ठ्यारो परेको बेला पसल नखोले कसरी तिर्ने ?’, उनीहरुको भनाई छ ।

त्यसै सन्दर्भमा आज व्यापार व्यवसायी संघ, गोकर्णेश्वरले, गोकर्णेश्वर नगरपालिका समक्ष “दैनिक बिहान ६ बजे देखि ११ बजे सम्म नियमित संचालन गर्न पाउँ” भन्दै निवेदन पेश गरेका छन् ।
“व्यापार व्यवसायी संघ, गोकर्णेश्वरले पेश गरेको निवेदन अनुसार हुने नहुने भन्ने निर्णय भने आज बेलुकीसम्म स्थायी समितिबाट आउन सक्ने भएकोले भोलीसम्म पर्खिन नगरपािलका वडा.नं ५ का वडा अध्यक्ष नारायणबहादुर सुवेदीले आग्रह गर्नुभयोे । व्यवसायीहरुले खाद्यान्य पसल मात्र नभई मोबाइलफोनदेखि, जुत्ता, फेन्सी लगायतका पसल ‘‘सामाजिक दूरी कायम गरी खोल्न पाउनु पर्ने माग गर्नुभएको छ । निर्णय के आउँछ हेरौं,” सुवेदीले भन्नुभयो ।