सरकारलाई कुनै हालतमा सफलपारौं : नारायण काजी

काठमाडौँ, २४ फागुन ।
नेकपाका सचिवालय तथा पार्टीको प्रवक्ता नारायणकाजी श्रेष्ठले समाजवाद निर्माण आधार तयार गर्न वर्तमान सरकारलाई हरहालतमा सफल बनाउनु पर्ने बताउँदै यसका लागि वस्तुपरक र अध्ययनशील पत्रकारिता गर्न पत्रकारहरुलाई आव्हान गर्नुभएको छ ।
शनिबार ललितपुरमा आयोजित प्रेस संगठन नेपाल उपत्यका प्रदेश कमिटीको प्रथम भेला एवं सपथ ग्रहण कार्यक्रमलाई सम्बोधन गर्दै श्रेष्ठले यो सरकार असफल भए कुनै न कुनै ढंगबाट विदेशी हस्तक्षेप वा प्रतिगमनको खतरा उत्पन्न हुने बताउनु भयो ।
कार्यक्रममा एकिकृत रुपमा निर्माण भएको प्रेस संगठन नेपालको उपत्यका प्रदेश कमिटीको साथमा उपत्यकाका काठमाडौँ, ललितपुर र भक्तपुर जिल्ला कमिटीको समेत सपथ ग्रहण समेत सम्पन्न भएको छ ।
पत्रकारिता अध्ययनशिल, जिम्मेवार.हुनुपर्नेमा जोड दिँदै उहाँले तथ्य र वस्तुगत कुराहरुको आत्मसात् गर्नु अहिलेको अनिवार्य आवश्यकता रहेको औल्याउनुभयो ।

नेकपाका स्थायी कमिटी सदस्य तथा बाग्मती प्रदेश कमिटीका इन्चार्ज अष्टलक्ष्मी शाक्यले मानिसको इच्छाशक्ति तिव्र भएको खण्डमा कोरोना भाइरसले केही समस्या उत्पन्न हुन नसक्ने उल्लेख गर्दै उहाँले उक्त हल्ला तथा भ्रमलाई चिर्दै यथार्थपरक जनतामा जानकारी बढाउन प्रेस संगठनले जवाफदेहिताका साथ अघि बढ्न आग्रह गर्नुभयो । संख्यात्मक रुपले मात्र बलियो भएर नहुने औल्याउँदै उहाँले गुणात्मक रुपमा विकास र विस्तार गर्नु अपरिहार्य रहेको बताउनुभयो । संगठनमा महिला पत्रकारको सहभागित बढाउनुपर्ने बताउँदै उहाँले संगठन तथा पार्टीलाई समानुपातिक तथा विभेदमुक्त बनाउनुपर्ने बताउनुभयो ।
प्रेस संगठनका इन्जार्च तथा केन्द्रीय सदस्य राजेन्द्र गौतमले प्रत्येक नेकपामा आवद्ध संगठनका सदस्यहरुले हामी नेकपाका सदस्य हौं भन्ने भावनाको विकास गर्नुपर्ने आवश्यकता रहेको बताउनभुयो । अन्य पार्टीका नेता तथा कार्यकर्ताको भन्दा भिन्न प्रकारको क्षमता र क्रियाशिलता हुनु अपरिहार्य रहेको औल्याउँदै उहाँले पार्टीको निष्कर्ष नै आफ्नो आश्था र विश्वासको धरोहर भएको बताउनुभयो । संगठनका पत्रकारहरुले पार्टी र सरकारको सकारात्मक आलोचना समेत आवश्यक रहेको औल्याउँदै समस्यालाई आन्तरिक छलफलको माध्यमबाट समस्याको समाधान गर्नुपर्नेमा जोड दिनुभयो ।
पार्टीको केन्द्रीय सदस्य, प्रचार विभाग उपप्रमुख तथा प्रधानमन्त्री केपी शर्मा ओलीको प्रेस सल्लाहाकार सूर्य थापाले संगठनलाई लोभलाग्दो र भरलाग्दो बनाउनुपर्नेमा जोड दिँदै पार्टीलाई नै प्रेरणाको स्रोतको रुपमा हुनुपर्ने बताउनुभयो । संचार क्षेत्रमा विभिन्न प्रकारका सुधारहरुको बारेमा संगठनले विगत लामो समयदेखी बहस चलाउँदै आएको र सरकारले सोही अनुसार सरकारले संस्थागत रुपमा कानुनी आधार तयार भएको बताउनुभयो । संविधानसँग बाझिने कुनै पनि कानुन नवन्ने दावी गर्दै बनेमा पनि अदालतले खारेज गर्ने स्पष्ट संवैधानिक अधिकार रहेको समेत उल्लेख गर्नुभयो ।
नेकपा बाग्मती प्रदेशका अध्यक्ष नारायण दाहालले कोरोना भाइरकबाट आतंक नभई सचेत हुन जरुरी रहेको औल्याउँदै कोरोनाको बारेमा मिडियाबाट आउने कुराहरु सत्य, तथ्य र वास्तविकता हुनुपर्नेमा जोड दिनुभयो । बाग्मती प्रदेशले सवै संगठन एकताका कार्यहरु सम्पन्न गरी सकेको उल्लेख गर्दै उहाँले आम नेपाली जनताको बिचमा सुदृढ तथा एकतावद्ध बनाउँदै लैजाने उल्लेख गर्नुभयो ।
न्युनतम पारिश्रमिक समितिका अध्यक्ष तथा पूर्वसंगठनका अध्यक्ष राजेन्द्र अर्यालले प्रेस संगठनका अधिकाशं सदस्यता नै उपत्यका कमिटीको सदस्यको रुपमा रहेको उल्लेख गर्दै नेता कमिटीको रुपमा विकास र विस्तार गर्नुपर्नेमा जोड दिनुभयो । आफ्नो जिम्मेवारी आम संगठनका साथीहरुको भावनाको प्रतिनिधित्व गर्ने उद्घोष गर्नुभयो ।